સો સરકાર કી … એક અન્ના કી…

મિત્રો, થોડા દિવસોથી આરામ પર હતો. બ્લોગ-લેખન પણ બંધ રાખ્યું હતું.વિચાર તો હતો કે, રક્ષાબંધનના  શુભ પર્વ પર એક નટખટ ભાઈ અને તેની મોટી બહેનના વહાલની વાર્તા મૂકીને ફરીથી બ્લોગ સફર શરૂ કરું. પણ વાર્તા પૂરી ટાઈપ થઈ શકી નહી. આમ તો ટાઈપ મારો વિષય નથી.  આ તો બ્લોગલેખન કરવું હોય તો  ટાઈપથી વેર રાખવું કેમનું  પોસાય? બાવા બને હૈ તો હિન્દી બોલના પડેગા.. જેવી વાત છે.

એ દરમ્યાન .. જુસ્સો, આક્રોશ, ફરિયાદો , આશા, વિશ્વાસ… ઉથલપાથલ… વગેરેથી છલકાતાં દૃશ્યો જોઈને એમ થાય છે કે: ખરેખર વાસ્તવિકતા કલ્પનાથી પણ ચઢિયાતી હોય છે.

માત્ર  એક જ દિવસમાં સમગ્ર સરકાર બાઘી પૂરવાર થઈ ગઈ!  અન્નાજીની મક્કમતાની ઓળખાણ જેટલી જનતાને હતી એટલી સરકારને નહોતી? સોનિયાજી જેમ ગુજરાતની પ્રજાની નાડ પારખવામાં ભૂલ ખાઈ ગયાં હતાં તેમ આ વખતે  દેશની પ્રજાની નાડ પારખવામાં ભૂલ ખાઈ ગયાં? રાહુલ ગાંધીએ તો ઘણું ભ્રમણ કર્યું હતું!એ કામ ન લાગ્યું? મનમોહનજીએ તો પહેલેથી  પરિક્ષામાં ડ્રોપ લેતા હોય તેમ કહી દીધું છે કે: અમારી પાસે જાદુઈ છડી નથી.

બેફામ વિધાનો કરનારા પ્રધાનો પર રસોઈ બગાડવાનો દોષ ન આવે તો જ નવાઈ!

સહુથી મહત્વની છે  અન્નાજીની એ સલાહ: હિંસા નહી કરની હૈ… રાષ્ટ્રીય સંપત્તિ કો હાનિ નહીં પહુંચાના… કિસી વ્યક્તિ કો હાનિ નહીં પહુંચાના… ચારથી પાંચ  મિનિટનું વક્તવ્ય કેટલી ઉર્જા પ્રગટાવી શકે છે એ જોઈને ભલભલા દંગ થઈ ગયાં હશે!

બાકી… જન સમર્થન.. લોકપ્રિયતા .. એ સિંહની સવારી બરાબર છે. સંયમ ન જળવાય તો આડું વેતારાતાં વાર ન લાગે! ઘણાં લોકો માટે આ ઘટનાઓ પોતપોતાની રોટી શેકવા માટે તૈયાર ચૂલા જેવી હોઈ શકે.

અત્યાર સુધીના બનાવો તો અન્નાજીની નિષ્ઠા અને મક્કમતાનો પરિચય આપે છે.

જેલમાં જતી વખતે એમના ચહેરા પરની આત્મવિશ્વાસથી  છલકાતું  સ્મિત ઘણું ઘણું કહેતું હતું.

બીમારીને સ્વીકારી લેનાર વ્યક્તિ જો એમ વિચારે કે: હવે આનો કોઈ ઈલાજ નથી. કોઈ આશા રાખ્યા વગર .. કોઈ સપનાં જોયા  વગર આમ જ પથારીમાં પડી રહેવાનું છે ને મરવાનું  છે. તો કોઈ ઈલાજ કામ ન પણ લાગે!

ભ્રષ્ટાચારને આપણે કેવી બીમારી ગણી શકીએ?

આજે નાનાંમોટાં સહુ એકાએક રસ્તા પર આવી ગયાં હોય એમ ભલે લાગે પણ એ માટેની એમની તૈયારી તો હતી જ! જરૂર હતી કે , કોઈ ભરોસાપાત્રનું  આહવાન  થાય.

જે યુવાની મોબાઈલ, બાઈક કે ફેશનના વળગણથી સાચાખોટા ઠપકાઓ સાંભળતી હતી એ જ યુવાનીને આજે ઠપકો આપવા જેવું કેમ નથી લાગતું?કારણ કે, એ જ યુવાની આજે પોતાનો આગવો રંગ બતાવી રહી છે.

એમના હાથમાં રહેલાં બેનર્સ પરનાં લખાણોને ક્યાં સુધી અવગણી શકાશે?

ને એમની અંદરની આગને ઉછીની લીધેલી આગ માનનારાઓ હજી પણ પોતાની ભૂલ સુધારી શકે છે.

એ માટે ચોઘડિયું જોવાની જરૂર નથી.

10 thoughts on “સો સરકાર કી … એક અન્ના કી…

  1. આરામ (બ્રેક કે બાદ) પછી નવી તાજગી સાથેના પુન:પ્રવેશ વેળાએ ભાવભીનું સ્વાગત છે.

  2. ઠક્કરસાહેબ!……આ તો સુપર ક્વોટ છે. “બીમારીને સ્વીકારી લેનાર વ્યક્તિ જો એમ વિચારે કે: હવે આનો કોઈ ઈલાજ નથી. કોઈ આશા રાખ્યા વગર .. કોઈ સપનાં જોયા વગર આમ જ પથારીમાં પડી રહેવાનું છે ને મરવાનું છે. તો કોઈ ઈલાજ કામ ન પણ લાગે!”

    • મુર્તઝાભાઈ,
      પરિસ્થિતિમાં પરિવર્તનની વાત આવે કે તરત આપણાથી જ બોલાઈ જાય કે- આ તો આમ જ ચાલવાનું. આવા તો કે આવા તો કેટલાય આંદોલનો થઈ ગયાં પણ કશું વળ્યું નથી. … તારણ ભલે હકીકત પર આધારિત હોય પણ એમાં સ્વીકારી લીધેલી હાર તો ખરી જ!
      ને જુઓ.. પરિવર્તન માટેની લોકોની તમન્ના. એમનો સંઘર્ષ… કોઈ ફિલ્મ સર્જકે પણ આવી પટકથા નહી વિચારી હોય!
      તમે આ ઘટનાઓમાં વિવિધ માધ્યમોએ ભજવેલા પાત્રને, એમના હિસ્સાને અને એમના પ્રભાવને સારી રીતે રજૂ કરી શકો.
      – અલબત્ત, અન્ના હજારેનો પ્રભાવ વગર બીજા માધ્યમો આટલી તાકાત બતાવી ન શકત.

  3. ગાંધીજી, સત્યાગ્રહની લડત અને આઝાદીની ચળવળ વિશે વાંચતા-સાંભળતા મનમાં થતું કે એ સમય કેવો હશે… પણ અન્ના હજારેની ભ્રષ્ટાચાર વિરોધી લડત, એને મળતું જનસમર્થન, જેલ જવા માટેની ઉત્સુકતા, ઉપવાસ તથા અહિંસક માર્ગે થતા આંદોલનને જોતાં લાગે છે કે ઈતિહાસનું પુનરાવર્તન થઈ રહ્યું છે…

    • દક્ષેશભાઈ,
      – અન્નાજીને જન સમર્થન તો હતું જ. પણ આટલું, આ રીતે અને આટલી ઝડપથી મળવાની ગણત્રી સરકારને તો નહી જ હોય.
      -સત્યાગ્રહની લડત વખતે શાસન અંગ્રેજોનું હતું. આજે આપણી જ સરકારનું શાસન છે.
      -હજુ સુધી એક પણ છમકલું થયું નથી.પ્રજામાં આક્રોશ છે. એને વ્યક્ત કરવાની રીત રસમો અહિંસક છે. આઝાદી પછી થયેલાં કેટલાક આંદોલનોમાં સંપત્તિની તોડફોડ થઈ હતી. કુરબાની પછી પણ હેતુ સિદ્ધ થયાં નહોતા.
      – ખરી કસોટી હવે છે.

  4. આદરણીય શ્રી યશવંત કાકા,

    મજબુત મનોબળ જે વ્યક્તિમાં હોય અને તે સર્વના કલ્યાણ માટે સંકલ્પ

    કરે ત્યારે સામાન્ય પ્રજાજન આપોઆપ તેના સંકલ્પને ઝીલી લે છે . આવું જ

    શ્રી અન્ન હજારેજીની બાબતમાં મન્યું. બેકાર બની નોકરી ન મળવાથી કે

    ડોનેશન વિના પ્રવેશ ન મળવાથી નારાજ યુવા વર્ગ તેમાં જોડાઈ ગયો

    સરકારને એમ કે બે કલાકમાં બધું સમેટાઈ જશે એટલે જેમ તેમ નિવેદનો

    કરવામાં ફસાઈ ગઈ ને આદોલન સમગ્ર ભારતમાં પ્રસરી ગયું.જો આદોલન

    લાંબુ ચાલે અને અહિસક રહે તો તેના પ્રત્યાઘાત પ્રજા માંસ પર જરૂર પડશે

    અને આઝાદી જેવું એક અનેરું આદોલન બની રહેશે.

  5. શ્રી યશવંતભાઈ,
    અણ્ણાનો ગાંધીવાદી પ્રભાવ તો માનવો પડે જ, આપે તો કદાચ અગાઉના કોઈ આંદોલનોમાં જોયું પણ હશે, અમે તો આ પ્રથમ વખત જોયું કે આટલા હજાર (દશ હજાર ઉપરાંત લોકો તો કાલે જ દિલ્હીમાં રસ્તા પર, આંદોલન અર્થે હતાનો અહેવાલ છે) માણસો એકઠ્ઠા મળ્યા અને માત્ર એક અણ્ણાના શાંતીભાવને હૃદયસ્થ કરી એક પાંદડું પણ ના તોડ્યું હોય !! આટલી સ્વયંશિસ્ત, કોઈ આંદોલનાત્મક કાર્યક્રમમાં, આ પેઢીએ તો પ્રથમ વખત જ જોઈ એમ કહું તો ખોટું નહીં. આજે આપણે તો ખરો જ, જગત આખાએ ભારતની કહેવાતી પછાતપ્રજાની બેમિશાલ સમજદારી પ્રત્યે ગર્વ અનુભવવો જોઈએ ! (ભ્રષ્ટાચાર તો જગત આખાને, વધુઓછો કનડે છે ને !)

    ’બાકી… જન સમર્થન.. લોકપ્રિયતા .. એ સિંહની સવારી બરાબર છે.’ એ વાત સાવ સાચી કહી, પણ હવે કોઈકે તો સિંહની સવારીનું જોખમ ખેડવું જ રહ્યું ને ! જોઈએ શું થાય છે, કહે છે ને કે પોદળો પડે તો ચપટીક ધૂળ લઈને તો ઉપડે. સૌએ યથાશક્તિ, યથામતિ પ્રયાસ કરવો રહ્યો. આભાર.

    • અશોકભાઈ,
      ગુજરાતના નવનિર્માણ આંદોલનના દ્રશ્યો યાદ આવે છે. આવો જ માહોલ હતો. શાસન સામે ખૂબ આક્રોશ હતો. પરંતુ કેટલાક તત્વોના પ્રભાવ હેઠળ રાષ્ટ્રીય સંપત્તિને નુકસાન થયું હતું. બસો બાળવામાં આવી હતી. ફૂટપાથો તૂટી હતી. … છેવટે એવું બહાર આવ્યું હતું કે આખું આંદોલનનો ઉપયોગ દિલ્હીમાં બેઠેલા નેતાઓએ ગુજરાતના મુખ્યમંત્રીને હટાવવામાં કર્યો હતો! એ સિવાયના કેટલાક આંદોલનોમાં પણ યુવાનોનો ભોગ લેવાયા છતાં પણ હેતુ સિદ્ધ થયાં નહોતા. પણ જનતા ધારે તો ભલભલાં શાસન ને હટાવી શકે છે એ તો જોવાં મળ્યું હતું.
      આ આંદોલન આવી રીતે જ ગૌરવપૂર્વક ચાલે એમાં જ સહુની શાન છે.

  6. Pingback: સો સરકાર કી … એક અન્ના કી… | | GujaratiLinks.comGujaratiLinks.com

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s