એક સફળ પ્રયોગ- વાંદરાનું બ્લોગલેખન!

Monkey ;).

Image via Wikipedia

મિત્રો,  આજનો યુગ સંશોધનનો યુગ છે. અવનવાં  સંશોધનો થયાં કરે છે! નવાં નવાં તારણો આવ્યાં કરે છે! તે માટે વારંવાર જાતજાતના પ્રયોગો થયા કરે છે! ક્યારેક સસલાને ચોકલેટ ખવડાવાય છે ને સાબિત કરાય છે કે ચોકલેટ ખાધાં પછી સસલાની દોડવાની શક્તિમાં વધારો થયો! ક્યારેક  ગલૂડિયાંને મહિનાઓ  સુધી  હિમેશ રેશમિયાનાં ગીતો સંભળાવાય છે ને પછી તારણ કઢાય છે કે:  આના પરિણામે ગલૂડિયાં વહેલાં ભસતાં થયાં! આ પ્રવૃત્તિ પાછળ મોટાં મોટાં ભેજાં કામ કરતાં હોય છે.

આવાં કેટલાક ભેજાઓએ એક વાંદરા દ્વારા  બ્લોગલેખન થઈ શકે કે નહીં તે માટેનો પ્રયોગ શરૂ  કર્યો.  બહુ જ  ઝડપથી  તેમને સારું પરિણામ મળ્યું. તેમને લાગ્યું કે- હવે જાહેરમાં વાંદરા દ્વારા બ્લોગલેખન થાય તો આખું વિશ્વ આપણા પ્રયોગનું સુંદર પરિણામ જોઈ શકે.   તેમણે તારીખ  અને સમય જાહેર કર્યાં.

મીડિયાને જોઈતો મસાલો મળી ગયો! ચર્ચાઓ ચાલુ થઈ ગઈ! ચેનલ્સ પરથી આકર્ષક  શીર્ષકો સાથે કાર્યક્રમો રજૂ થવા લાગ્યા. જેવા કે:

— એક પૂર્વજનું બ્લોગલેખન!

— એક બંદર બ્લોગજગત કે અંદર.

– બંદર કરેગા બ્લોગલેખન.

-લેખકો કી નહીં ચલેગી દાદાગીરી.

– બંદર કરેગા અપને મન કી બાત.

ચેનલ્સ પરથી મેસેજ માટે   દર્શકોને આમંત્રણો અપાયાં. જેમ કે :

— તમને શું લાગે છે? વાંદરો બ્લોગ લખશે? હા  કે ના?..અમને SMS કરો.

— વાંદરો પહેલી પોસ્ટ શાની કરશે?  ગઝલ?  ગીત ? વાર્તા?  પોતાની રોજનીશી ? .. અમને SMS  કરો.

—- તમને શું લાગે છે? માનવ-લેખકો ભૂતકાળની  વાત બની જશે?  હા કે ના? … અમને SMS કરો.

ટીવીના પરદા પરથી એનિમેશન દ્વારા વાંદરાના બ્લોગલેખનની તસવીરોનો ઢગલો થવા લાગ્યો!

પતંગિયાં  જેવી છોકરીઓ  બંદરના મહોરાં પહેરીને  મીઠું મીઠું બકબકવા લાગી!

જો વાંદરા બ્લોગલેખન કરી શકે તો ભવિષ્યમાં  લેખક કે ચિંતક પણ બની શકે  એવી સંભાવનાઓ પ્રગટવા લાગી.  ટીવી સ્ટુડિઓમાં એના એ જ  ખખડી ગયેલા ચિંતકો અને લેખકોની સાથે વાર્તાલાપો થવા લાગ્યા.  તમાચો મારીને ગાલ રાતો રાખતા હોય તેમ તેઓ મને કમને આ નવી ક્રાંતિને આવકારવા લાગ્યા.

બહુ જ ટૂંકા સમયમાં વાંદરાઓ ઓરકુટ અને ફેસબૂક જેવી વેબસાઈટ પર પણ સક્રિય થઈ જશે એવી અપેક્ષાઓ રજૂ થવા લાગી!

ટૂંકમાં મેડિયાની તાકાતના  કારણે  બંદરોત્સવ જેવો માહોલ થઈ ચૂક્યો! દર્શકો પેટ્રોલનો કે અન્ય ચીજોનો ભવવધારો ભૂલી  ગયા! કૌભાંડો  ભૂલી  ગયા!

વિરોધપક્ષોને આ આખી ઘટના પાછળ સત્તાધારી પક્ષનો  હાથ દેખાવા લાગ્યો!

જેને બ્લોગલેખન બાબત કશી જાણકારી નહોતી તેમને પણ ખબર પડવા ગી કે —– બ્લોગ કેમ બનાવાય, કેમ લખાય,  કેવી ચર્ચાઓ થાય અનેર કેવી  જાણકારી વધે ને સૂંઠના ગાંગડે કેવીરીતે ગાંધી થઈ જવાય!

એક વાંદરો બ્લોગ લખે  તો આપણે તો માણસ જેવા માણસ! આપણે પણ કેમ બ્લોગ ન બનાવીએ?એવી પ્રેરણાથી દોરવાઈને માંડ્યા બધાં બ્લોગ બનાવવા! જેને સગવડ નહોતી તેઓ સગાંવહાલાંને ત્યાં પહોંચ્યાં!  સાયબર કેફેમાં ચહલપહલ વધી ગઈ!  સાયબરકેફેની બહાર ભાવવધારાનાં પાટિયાં ઝૂલવાં લાગ્યાં.

યથાશક્તિ બ્લોગદાનનો પ્રવાહ શરૂ થયો! બ્લોગ્સની અંખ્યામાં ભયંકર ઉછાળો આવ્યો.

… અને મિત્રો,  એ  ધન્ય ઘડી  આવી પહોંચી!

એક જાહેર કાર્યક્રમમાં ઇન્ટરનેટના જોડાણ સાથેનું  કમ્પ્યૂટર  મુકાઈ ગયું!

પત્રકારો  અને  તસવીરકારો  સાવધાન થઈ ગયા.  આખરે પોતપોતાની ચેનલના વટનો સવાલ હતો. આ કાર્યક્રમને દર્શકો સમક્ષ  એવી ક્રીતે રજૂ કરવાનો હતો કે દર્શક  ચેનલ બદલવાનું નામ ન લે.

વારતહેવારે હાજર થઈ જવાની કુશળતા ધરાવનારા રાજકીય,સામાજિક તેમ જ ધાર્મિક આગેવાનો આવી  પહોંચ્યા હતા.

ખાસ પસંદ કરાયેલા લોકોને  આ કાર્યક્રમના ભાગીદાર બનાવાયા હતા. જેમાંથી ઘણાંના હાથમાં સ્લોગન લખેલાં પાટિયાં હતા. તો ઘણાંના ચહેરા પર વાનરનાંમહોરાં હતાં.

દર્શકો ટીવી  સામેથી હટવાનું નામ નહોતા લેતા.

છેવટે એ ધન્ય ઘડી પણ આવી પહોંચી.

ને આવી પહોંચ્યા  વાનરશ્રી!

પ્રાણીપ્રેમી મંડળની બહેનોએ વાંદરાની આરતી ઉતારી. તેને  ચમચી ભરીને દહીં ખવડાવ્યું.  વાંદરાની ડોક હારતોરાથી ઢંકાઈ ગઈ.  આ કારણે અકળાયેલા વાંદરાએ હારતોરાને તોડીને પોતાની નારાજગી રજૂ કરી  જેની જાણ સહુ પ્રથમ પોતાના દર્શકો સુધી પહોંચાડી હોવાની શેખી દરેક ચેનલ મારવા લાગી!

વાંદરો કમ્પ્યૂટર તરફ આગળ વધ્યો.  હરખપદુડી જનતા પોકારો કરવા લાગી…

— બંદરજી તૂમ આગે બઢો.. હમ તૂમ્હારે સાથ હૈ.

— બંદર સે જો ટકરાયેગા … સીધા ઉપર જાયેગા.

— બંદરજી  કરેગા  બ્લોગલેખન… આજ દેખેગા ઇંન્સાન.

વાંદરો કમ્પ્યૂટરની સાવ  સામે  પહોંચ્યો.  વિશ્વભરના દર્શકોના દિલની ધડકનો વધી ગઈ! શું થશે?  વાંદર બ્લોગલેખન કરશે કે નહી? કરશે તો કેવું કરશે?

પોસ્ટનું શીર્ષક તો તૈયાર જ હતું.

પ્રથમ ચરણ

વાંદરાએ માત્ર પોસ્ટનું લખાણ લખવાનું હતુ.

.. ને વાંદરાએ આજુબાજુ નજર કરી.  તેને લખવાનો મૂડ આવે તે માટે  ફળોની ટોપલી પણ તૈયાર હતી.

વાંદરો  ફળો  ખાવા લાગ્યો અને ખાતાં ખાતાં  ફળો જનતા તરફ પણ ફેંકવા લાગ્યો.  કોઈ બાપુશ્રીએ ફેંકેલો પ્રસાદ ઝીલતી હોય તેમ હરખઘેલી જનતા પડાપડી કરવા લાગી. જેના કારણે ઘણાં લોકો ભોંયભેગાં થઈ ગયાં.

થોડીવાર માટે અફડાતફડીનો માહોલ થઈ ગયો.

આયોજકોના જીવ અધ્ધર થઈ ગયા.

ત્યાં તો વાંદરો ફરી કમ્પ્યૂટર  તરફ આગળ વધ્યો. હવે  તે  આત્મવિશ્વાસથી ભરપૂર હતો.

તેણે જનતા તરફ જોઈને  પોતાનો હાથ ઊંચો કર્યો.

જનતા ભાવવિભોર થઈ ગઈ!

આયોજકોના જીવમાં જીવ આવ્યો.

વાંદરો કમ્પ્યુટરની સાવ સામે પહોંચ્યો.

કેમેરા સાવધાન થઈ ગયા.

વાંદરાએ  એક નજર પોતાના બ્લોગ પર કરી.

પછી તેણે બીજી  કોઈ વેબસાઈટ ખોલી!

ક્લિક કરીને …

Ctrl + A   કર્યું.

પછી કર્યું… Ctrl + C

ને પછી આવ્યો પોતાના બ્લોગ પર પોસ્ટ કરવા.

પણ એ પોસ્ટ કરતાં પહેલાં તેણે દબંગ સ્ટાઈલથી ડાન્સ કર્યો.  વિશ્વભેરના યુવાનો આ દૃશ્યથી પ્રભાવિત થઈને ઝૂમી ઊઠયા.

ને વાંદરાએ કરી નાંખ્યું  Ctrl + V …

ને ફરીથી જનતા તરફ હાથ હલાવીને સમગ્ર પ્રયોગની સફળતાનો ડંકો વગાડતો હોય તેમ Publish પર  ક્લિક કરી દીધું!

ને દુનિયાભરમાં વાનરશ્રીનો જયજયકાર થઈ ગયો.

આયોજકો એકબીજાને હરખથી ભેટી પડ્યા.

આખરે તેમના થકી જ એક નવા યુગનું મંડાણ થઈ ચૂક્યું હતું.

ને છેલ્લી વાત!….

એ પોસ્ટના લખાણ વાંચવા મટે આયોજકોને પણ માથાકૂટ  કરવી પડી!

ચાઈનીઝ ભાષાના જાણકારોની મદદ લેવી પડી!

હવે માણો અમારું કૉપીપેસ્ટ… http://en.wikipedia.org/wiki/Infinite_monkey_theorem ના સૌજન્યથી તેમજ  બ્લોગમિત્ર પંચમભાઈના સૂચન થકી.

Given enough time, a hypothetical chimpanzeetyping at random would, as part of its output,almost surely produce all of Shakespeare’s plays. Note that a chimpanzee is not a monkey, but anape.
અને આ પણ …
સૌજન્ય – http://www.100monkeys.org/about/

22 thoughts on “એક સફળ પ્રયોગ- વાંદરાનું બ્લોગલેખન!

  1. હી…હા…હા..હા..!!!
    હવે માણસો બધા આવી જાવ અમારે ત્યાં ગીરનાં જંગલમાં ! ચાલો હવે માણસોને માથેથી બ્લોગ લેખનની જવાબદારીતો ટળી. આમે માણસોને ક્યાં કંઇ બ્લોગ ફ્લોગ લખતા આવડે છે ! કેટલી ભુલો કરે છે, બાપ…રે ! આથી તો ભલા વાંદરા, જાતે કશું વિચારવું કે સંશોધન કરવું કે ટાઇપ કરવું આવા મોહ ત્યજીને ફરી એક વખત સફળ ઉત્ક્રાંતિ કરશે. અને હા એક લાભ એ પણ ખરો કે કિ-બોર્ડ સસ્તા થશે ! માત્ર ctrl, A, C, અને V એટલી કિ થી કામ ચાલી જશે ને !
    અને શ્રી યશવંતભાઇ, હવે તો જરા સુધારાવાદી બનો ! આ વાંદરાઓને કુદરતે બનાવી અને તે પર પોતાનો કોઇ કોપિરાઇટ નથી રાખ્યો તો વાંદરાનાં ફોટા પાડનારે તેના ફોટા પર પોતાનો કોપિરાઇટ રાખવો એ મૂર્ખતા નથી ? આપે સુધારાવાદી બની અને ગમે તે ’વાંદરા’નો ફોટો અહીં ચઢાવી દેવો જોઇએ. નકામી આ કોપિ હીન કપિ શોધવાની મહેનત કરી !!
    આપની કલા ને સો સો સલામ. આભાર.

  2. અને હવે નવી જાતીના વાંદરાઓ વધુ ‘સ્માર્ટ’ બન્યા છે. તેઓ હવે કોઈ એક લેખમાંથી કૉપી-પેસ્ટ કરવાને બદલે એક કરતાં વધારે લેખમાંથી કૉપી કરી થોડું પોતાનું ઉમેરી માણસ જાતને છેતરતા જોવા મળે છે!

  3. યશવંતભાઈ,

    ચોટદાર, દર વખત કરતા કટાક્ષનું મરચું ખૂબ વધુ થઈ ગયેલ છે, એટલે તીખી તમતમતી ફરાળી વાનગી થઈ છે.

    તાજા સમાચાર મુજબ એ વાંદરાનો એક અગ્રગણ્ય વર્તમાનપત્રએ ઈન્ટરવ્યુ લઈને પૂછ્યું છે કે “કૉપી પેસ્ટ વિશે આપનું શું કહેવું છે”, અને વાંદરાએ એ પ્રવૃત્તિનો સજ્જડ વિરોધ કર્યો છે.

    • અમારો ઇરાદો સાફ હોય છે. એક સાથે અનેક નિશાનો તાકતી હોય તેવી રચના મૂકવાનો.
      જો સહેજ જ ધ્યાનથી વાંચવામાં આવે તો પણ ખ્યાલ આવી શકે એમ છે કે- આ લખાણમાં કટાક્ષ મીડિયાગીરી પર છે. સનસનાટી પર છે. સંશોધનો પર છે. તારણો પર છે. નકલખોરી પર છે. ચાઈના પર પણ છે!
      જ્યારે કોઈ રચના લખાતી હોય ત્યારે લખનારના મનમાં અનેક સંભાવનાઓ આકાર લેતી જાય અને નવું નવું ઉમેરાતું જાય. રચના તૈયાર થયા પછી પણ જવાબદાર લેખક એમાં ક્ષતિ ન રહી જાય તેની પણ ફિકર કરતો જ હોય.
      એમ છતાંય કોઈ રચનાત્મક ટીકા થાય તો એ સહન કરવાની અને એનો જવાબ આપવાની એની તૈયારી હોય જ.
      પરંતુ કોઈએ લખી નાંખ્યું અને જવાબદાર ગણાતા બ્લોગર્સ આગળપાછળનું જાણ્યા વગર ઉતાવળે પોતાનો સિદ્ધાંત અને મત પ્રગટ કરી દે ત્યારે સિદ્ધાંતો કે મંતવ્યો કેટલા દુ:ખદાયક હોય છે તેનું જરૂર ભાન થાય છે.

  4. નવાઈ લાગે છે કે ” વાંદરાઓ ની નકલખોરી” પર એક આવડો મોટો લેખ લખી શકાય છે!!!! મને લાગે છે કે “બ્લોગ” લેખન કદાચ વધારે પડતું “ગંભીર” અને “રૂઢીચુસ્ત” થઇ રહ્યું છે….!!

    • શ્રી રાજભાઈ..
      આપના પ્રતિભાવનું સ્વાગત છે.
      આ રચના માત્ર વાંદરાઓની નકલખોરી પર નથી. આખી ઘટના એક પ્રતિક છે. આપનો આ પ્રતિભાવ આવે તે પહેલાં એક જવાબમાં અમે જે લખ્યું તે કૉપીપેસ્ટ કરીને ફરીથી અહીં મૂકીએ છીએ..
      જો સહેજ જ ધ્યાનથી વાંચવામાં આવે તો પણ ખ્યાલ આવી શકે એમ છે કે- આ લખાણમાં કટાક્ષ મીડિયાગીરી પર છે. સનસનાટી પર છે. સંશોધનો પર છે. તારણો પર છે. નકલખોરી પર છે. ચાઈના પર પણ છે!
      જ્યારે કોઈ રચના લખાતી હોય ત્યારે લખનારના મનમાં અનેક સંભાવનાઓ આકાર લેતી જાય અને નવું નવું ઉમેરાતું જાય. રચના તૈયાર થયા પછી પણ જવાબદાર લેખક એમાં ક્ષતિ ન રહી જાય તેની પણ ફિકર કરતો જ હોય.
      એમ છતાંય કોઈ રચનાત્મક ટીકા થાય તો એ સહન કરવાની અને એનો જવાબ આપવાની એની તૈયારી હોય જ.
      કૉપીપેસ્ટ રચનાત્મક પણ હોઈ શકે અને માત્ર ઉઠાંતરી પણ હોઈ શકે. એ કઈ રીતે થાય છે અને શા માટે થાય છે તેના પર બધો આધાર છે. આ વિષે ઘણી ચોખવટ કરેલી છે પુનરાવર્તન નથી કરવું.

      રાજભાઈ. શું અમારું આ લખાણ ગંભીરતા અને રૂઢીચુસ્તતા પર પ્રકાશ નથી ફેંકતું?… જો વાંદરા બ્લોગલેખન કરી શકે તો ભવિષ્યમાં લેખક કે ચિંતક પણ બની શકે એવી સંભાવનાઓ પ્રગટવા લાગી. ટીવી સ્ટુડિઓમાં એના એ જ ખખડી ગયેલા ચિંતકો અને લેખકોની સાથે વાર્તાલાપો થવા લાગ્યા. તમાચો મારીને ગાલ રાતો રાખતા હોય તેમ તેઓ મને કમને આ નવી ક્રાંતિને આવકારવા લાગ્યા.
      અલબત્ત.. આપનો પ્રતિભાવ અમારે માટે જરૂરી છે કારણ કે એ કારણે આ વાત કહેવાનો મોકો મળ્યો. ફરીથી પધારશો.

      • અને આ લખાણ .. વાંદરો ફળો ખાવા લાગ્યો અને ખાતાં ખાતાં ફળો જનતા તરફ પણ ફેંકવા લાગ્યો. કોઈ બાપુશ્રીએ ફેંકેલો પ્રસાદ ઝીલતી હોય તેમ હરખઘેલી જનતા પડાપડી કરવા લાગી. જેના કારણે ઘણાં લોકો ભોંયભેગાં થઈ ગયાં.
        ટૂંકમાં ઘણી ઘણી બાબતો પર કટાક્ષ છે… જે અમારી દૃષ્ટિએ ગંભીર કે
        રૂઢીચુસ્ત નથી.

  5. વાંદરાના બ્લોગ અંગે વિચાર સ રસ છે.
    વાંદરા અંગે આવા પ્રયોગ પણ થાય છે !
    આ વાંદરાઓનું એક સામૂહિક મન હોવું જોઈએ. આ સામુહિક મન દ્વારા તેમની વચ્ચે વિનિમય શક્ય બને છે. અનેક કોમ્પ્યુટરને એક સાથે સાંકળી લેવામાં આવે છે. ત્યાર પછી કોઈ એક કમ્પ્યુટરમાં જે કાંઈ કાર્ય કરવામાં આવે તે સર્વ સંબંધિત કમ્પ્યુટર્સમાં આપોઆપ પહોંચી જાય છે. કાંઈક આવું જ આ વાંદરાઓનાં મનમાં બન્યું. આ સર્વ વાંદરાઓનાં મન એક સામૂહિક મન દ્વારા અન્યોન્ય સંકળાયેલાં છે. પ્રથમ ટાપુના વાંદરાઓને જે શીખવવામાં આવ્યું તે આ સામૂહિક મનના માધ્યમથી અન્ય ટાપુ પરના સૌ વાંદરાઓનાં મન સુધી પહોંચી ગયું. આ સામૂહિક મનરૂપી સંપર્કસૂત્ર હોવાથી જ દ્વિતીય ટાપુના વાંદરાઓ ઝડપથી શીખી ગયા અને તૃતીય ટાપુના વાંદરાઓ તો તેથી પણ વધુ ઝડપથી શીખી ગયા.
    યંગ એક બહુ મોટા મનોવિજ્ઞાની હતા. પ્રારંભમાં તો યંગ ફ્રોઈડના શિષ્ય હતા, પરંતુ પછી તેઓ તેમનાથી છૂટા પડી ગયા હતા. ફ્રોઈડે અજાગ્રત મનનો સિદ્ધાંત આપ્યો છે. ફ્રોઈડથી આગળ વધીને યંગ એમ કહે છે કે અજાગ્રત મનના બે ભાગ છે – વ્યક્તિગત અજાગ્રત મન અને જાતિગત અજાગ્રત મન. જેમ વ્યક્તિને પોતાનું અજાગ્રત મન હોય છે, તેમ જાતિને પણ પોતાનું અજાગ્રત મન હોય છે. જાતિના સર્વે સભ્યો આ જાતિગત અજાગ્રત મન દ્વારા અન્યોન્ય સંકળાયેલા રહે છે. આ અજાગ્રત મન જાતિના સર્વે સભ્યો વચ્ચેનું સંપર્કસૂત્ર છે. જો વાંદરાઓમાં જાતિગત અજાગ્રત મનરૂપી સંપર્કસૂત્ર છે, તો માનવજાતિમાં આવું જ કે સંભવતઃ આનાથી પણ વધુ વિકસિત જાતિગત અજાગ્રત મનરૂપી સંપર્કસૂત્ર ન હોય ?

    હોય જ અને છે જ.

    • આપના દરેક પ્રતિભાવો એટલા માટે આનંદ આપનારા હોય છે કે-તેમાં કશી ને કશી નવી જાણકારી હોય છે. જે અમારા માટે નવી હોય છે. ફ્રોઈડ બાબત વાંચ્યું હતું પણ યંગ બાબત જાણીને આનંદ થયો.
      બ્લોગલેખનની આ તો મજા છે કે – એક સામાન્ય હાસ્યરચના પણ અનેક અનેક સંદર્ભો અને જાણકારીથી પરિચિત કરે છે.

  6. ખૂબ મઝા કરાવી ગયો આ લેખ. આમ તો, આ હસવાની ઓથે એક જાગરૂક બ્લોગરનું મંદ્ર વિલપન છે- પણ એ તો જેવી જેની વાચન, ગ્રહણ અને ચિંતન શક્તિ.

    તમે કટાક્ષને પણ પ્રમાણમાં ડાઈલ્યુટ કરીને મૂકો છો કે કોઈને એસિડિટી ન થઈ જાય પણ આ વખતે શિયાળો સારો છે એટલે બરાબર તેજાના નાખ્યા છે. ઓણ શિયાળે આટલું તેજ તો જોઈએ.

    આંગ્લવિશ્વમાં તો ‘વાંદરો અને ટાઈપિંગ’ના સંયોજનના શબ્દપ્રયોગો એક કહેવતની કક્ષાએ સમાન્ય ઑફિસથી યુનિવર્સિટી સુધી ચારેકોર વપરાતા જોયા છે. એમ કહેવાય છે કે સંભાવના (પ્રોબેબિલિટી) મુજબ એક વાંદરો અનંત સમય સુધી કીબોર્ડ પર કશુંક ને કશુંક ટાઈપ કરતાં કરતાં આખો શેક્સપિયર છાપી નાખે. આ Infinite Monkey Theorem વાત તમને આ લિંક પરથી વાંચવી/જોવી ગમશે.. (એમાંની તસ્વીરનું Crtl+c+v) કરી આ લેખ સાથે ચોંટણ કરવા જેવું છે.

    http://en.wikipedia.org/wiki/Infinite_monkey_theorem

    (As the old quote by Thomas Henry Huxley roughly states, if you left a hundred monkeys in front of a hundred typewriters for a hundred years eventually you’d manage to get a Shakespearean sonnet.)
    http://www.100monkeys.org/about/

    • પંચમભાઈ. ખૂબ ખૂબ આભાર. આમ તો તમે ગઝલના માણસ કહેવાઓ. છતાંય અમારી કાલ્પનિક કથાઓ પર નજર ફેરવો છો.
      એટલું જ નહીં પણ કશું ને કશું એવું કહીને જાઓ છો કે – જે અમારે માટે અનોખું હોય છે. વળી એ રચનાને અનુરૂપ હોય છે.
      હાસ્યરચના ભલે માત્ર તર્ક પર કે કલ્પના પર આધારિત હોય પણ એ અનેક નિશાનો તાકતી હોઈ શકે છે. બને છે એવું કે -કેટલાક મિત્રો પોતાને ગમતું કે અણગમતું નિશાન ધ્યાનમાં લે છે અને બાકીનાં નિશાનોને બ્લોગાર્પણ કરી દે છે.
      નાનપણમાં “અનુકરણ એ જ મરણ” એવો હાસ્યનિબંધ વાંચેલો. કદાચ શ્રી જ્યોતિન્દ્ર દવે લેખિત હતો. એટલો બધો ગમી ગયેલો કે- આખા નિબંધની પેન દ્વારા નોટબૂકમાં નકલ કરી લીધી. શું કરીએ? ત્યારે કૉપીપેસ્ટ થાય એવી સગવડ નહોતી!એ નિબંધમાં વાંદરા અને ટોપીવાળાની વાર્તાનો પણ ઉલ્લેખ હતો.
      ત્યારબાદ એક એવી હાસ્યવાર્તા પણ વાંચવામાં આવી હતી કે – જેમાં ટોપીવાળો પોતાના માથા પરથી ટોપી ફેંકે છે ત્યારે જેના ભાગમાં ટોપી નહોતી આવી તે વાંદરો આવીને એ ટોપી લઈને પાછો ઝાડ પર જતો રહે છે!
      આજે અમે એ જ વાતને આજના માધ્યમો દ્વારા સજાવીધજાવી!
      તમારા સૂચનને ન્યાય આપીશું.

  7. ખરેખર…એક તીર, સો નિશાન…

    યોગેંદુ જોશીની એક પંક્તિ યાદ આવી ગઈ:

    વિચારો મારા શું કામ વેસ્ટ કરું,
    ચાલ ફરીથી કોપી પેસ્ટ કરું.

  8. આ વખતે તમે તમારી રીત અને ભાત બન્ને બદલ્યાં છે. વાંદરો શબ્દ જ જરા ભારે છે. પણ નકલ કરવાની વાત હોય ત્યારે એ જ એકમેવ પ્રાણી લેવાનું હોય…

    એકાધિક લક્ષ્યોને વીંધતું તમારું આ લખાણ ખાસ કરીને ચેનલોવાળાના જે ચાળા પાડી ગયું છે તે તો કાબીલે દાદ છે. કૉપી–પેસ્ટની વાત તમે કીબોર્ડના જાણીતા અક્ષરો દ્વારા મુકી સારું કર્યું છે. પ્રેક્ષકોના મૂડને પણ સરસ ઉપસાવ્યા છે. ઈંતેજારી અને એક્સાઈટમેન્ટ બન્નેને ન્યાય આપ્યો છે.

    તમારો લેખન અનુભવ આ બધી શૈલીઓમાં બરાબર કામ આવી રહ્યો છે. જો કોઈને શીખવામાં રસ હોય તો તેણે તમારી શૈલીને અને ભાષાને તથા વિષયવસ્તુ ઉપસાવવાની રીતિને ઝીણવટથી જાણવી જોઈએ. પદ્ય અને ગદ્યમાં ગદ્યને અઘરું કહ્યું છે. ફક્ત ટટકારી દેવાથી લેખન થતું નથી…તમારી પાસેથી શીખવાનું ઘણું છે.

    મારા જેવાને તમારી પાસેથી ઘણું મળે છે. ખૂબ પ્રગટો.

    • જુગલકિશોરભાઈ,
      આ બ્લોગજગત ન હોત તો આટલું ન લખાત. બ્લોગલેખન એ સામયિકોમાં લખાતાં લેખન કરતાં અલગ છે. જે થોડુંઘણું સમજમાં આવ્યું છે. આમાં મજા એ છે કે -ત્વરિત આઘાત-પ્રત્યાઘાત મળે છે!
      વાંચન,અનુભવ,શિસ્ત વગેરે કામ લાગે છે. આસપાસ જીવાતા જીવનમાં રસ પડવો તે સહુથી મોટી વાત છે!
      બ્લોગ પર કદાચ જેવું તેવું લખાણ મૂકી દઈએ તો પણ કોઈ રોકનાર નથી.પણ,એવું કરવાનું મન નથી થતું.કોઈ સંપાદક નથી તો શું થયું? અમારી નજર સમક્ષ એની મૂર્તિ હોય છે! અને.. આપ સમાન મિત્રો હોય છે.
      આ કારણે સ્વ્યંશિસ્ત જળવાતી હોય છે.

  9. આદરણીય શ્રી યશવંત કાકા ,

    વાહ કાકા વાહ , અસરના ઓટલેથી આપની કસાયેલી કલમ દ્વારા આપે

    મીડિયા ,ચેનલો, પ્રાણી પ્રેમી મંડળો ,ચાઈના, હર્ષ ઘેલા આયોજકો બધાને

    તેમજ કોપીના નિષ્ણાતો,સાયબર કાફે, ભાવ વધારો ,સ્લોગનો , વિગેરેને એક

    ન્યુનતમ સંદેશ આપ્યો. હવે આ પ્રાણીઓ સમજે તો સારું.

    બસ અસરની આ એક અનોખી ખાસિયત છે કે જયારે નવું નઝરાણું આવે

    ત્યારે દરેક સમયે જુદા જુદા અનન્ય સંદેશ આપે છે. અભિનંદન.

  10. તમારી પાસેથી વક્રોક્તિને તમારા વાસણો જેટલી નક્કર અને છતાં સુરેખ આકારબધ્ધ
    કરવાનું શીખવા જેવું છે.એક સુદ્રઢ આકારમાં સર્જકતાને કટીબધ્ધ કરી અખાની જેમ
    વક્ર ભાષામાં ચાબખા મારવાની ભાષાશક્તિ “અસર”ની વિલક્ષણતા છે અને તેથીજ
    વાંચીને સાંભળવાની ગમે છે.

  11. વાંદરાઓએ બ્લોગ લેખન શરૂ કર્યુ પણ ચિંતાની કોઈ વાત નથી, બ્લોગ જગતના મદારીઓ બાહોશ છે, પણ હવે તેઓએ તેમની ભૂમિકા સારી રીતે ભજવવી પડશે…!

  12. Ctrl+c…..Ctrl+v (mari comment vanchava ni tasdi leva jevi nathi…:D)

    Tamari pasethi nava nava prayogo madta rahe ej ichha.

  13. પ્રિય , વ્હાલા યશવંત અંકલ , બહુ મજા પડી આ કટાક્ષલેખ વાંચવાની. આપના “સેન્સ ઓફ હ્યુમર ” નો પણ સારો પરિચય થયો

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s