એ…ગુલ્ફીમલાઈ

શહેરમાં કે  ગામડાંમાં   લોકોંની તાપ કે ગરમી સહન કરવાની શક્તિ ઘટી ગઈ છે.  બદલાતું હવામાન કે  પ્રદુષણમાં  વધારો  જેવાં કારણો તો હોઠવગાં છે.પણ તાપ કે ગરમીનો સામનો કરવાના સાધનો વધ્યાં છે એ પણ એક કારણ હોઈ શકે.

મને ત્રીસેક વર્ષો પહેલાંનું મારું નાનીધારી ગામ અને તે વખતના ઉનાળા યાદ આવે છે. એ વખતે  ઉનાળાની બપોરે તાપ કે ગરમીથી બચવા  માટે લોકો પાસે કેવાં વિકલ્પો હતાં ? મનમાં એવો સવાલ થાય છે ને એનો જવાબ મેળવવાની મથામણ  કરું છું. મને લાગે છે કે સૌથી સારો ઉપાય હતો :સહન કરવાનો! છતાંય  બીજા વિકલ્પોની યાદી બનાવવી હોય તો કાઈંક આવી બને:  છાંયો, ઝાડ, નદી…. બસ આગળ કશું યાદ આવતું નથી! હોય તો યાદ આવેને?

પણ  આતો થયા કુદરતી ઉપાયો! માણસોના પોતાનો ઉપાયો? એની યાદી બનવીએ તો : હાથપંખો, ભીનું કપડું, છાશ કે  વરિયાળીનું સરબત… બસ આગળ કશું નહીં!!!

એમ થાય કે કેટલી ઓછી જરૂરિયાતો! કોઈને એવું લાગે કે માણસ ત્યારે કેટલો સુખી હતો! કોઈને એવું પણ લાગે કે માણસ ત્યારે કેટલો લાચાર અને દુ:ખી હતો!!! એવી ચર્ચામાં અત્યારે ઉતરવા કરતાં  હું મારી વાત આગળ વધારીશ.

સહેલામાં સહેલો અને અઘરામાં અઘરો  ઉપાય સહન કરવાનો. બસ. સૂરજને ધગવું હોય એટલું ધગે. તાવ સહન કરતા હોઈએ એમ તાપ સહન કરી લેવાનો! અને ના થાય તો છાંયો ગોતી લેવાનો. છાંયો..  મકાનના પડછાયામાં. છાંયો.. ગાયો અને ભેંસોના ઢાળિયામાં . છાંયો .. ઓસરીમાં કે હલાણમાં. શરત એટલી કે પવનની એકાદ લહેરખી જો ભૂલી પડી હોય તો એ રોકાવી ના જોઈએ. ને એમાંય જો   લીમડાનાં  ઝાડ હેઠે ખાટલો નાખી દીધો હોય તો ભયો ભયો! છાંયડામાં કૂતરાંનો  પણ  હિસ્સો રહેતો હો !

દુકાળનું વરસ ના હોય અને નદી વહેતી હોય તો એના જેવું એકેય સુખ નહીં. ટાબરિયાં તો નદીમાંથી બહાર નીકળવાનું નામ ના લે. કાંઠે આંબા કે વડલાનાં ઝાડ અને ઝાડ  હેઠે ગાયો અને ભેંસોએ   સમાધી ચડાવી હોય અને ભરવાડ કે ખેડૂત પોતાનાં પનિયાંનું ઓશિકું કરીને  ઝાડ હેઠે આડો પડ્યો હોય ત્યારે શહેરનો કોઈ ઉતપાતિયો માણસ આવી ચડ્યો હોય તો એનેય મન થાય કે: લાવ હુંય થોડો આરામ ફરમાવી લઉં .  તેલ  લેવા ગઈ  દુનિયા!

વીજળી આવી નહોતી એટલે પંખાનો સવાલ નહોતો.  હાથપંખાનો ઉપયોગ સુધરેલાં હોય એ કરે! બાકી એવાં કષ્ટ  કોણ ઉઠાવે? માથે  કે કપાળે ભીનું કપડું મૂકી દીધું એટલે કામ પત્યું.  સર સલામત તો પઘડી બહોત. પીણામાં તો માટલાવગું પાણી ! છાશ  તો બપોરે જમવામાં લીધી હોય અને સરબત તો મહેમાન આવ્યા હોય તોજ બનાવાય!

આ હતા તાપ કે ગરમી સહન કરવાના ઉપાયો! પણ  એ ઓછા હોય એમ ખાંભા શહેર[?]થી  કૂલ્ફી વેચવાવાળો  સાયકલ પર સવાર થઈને આવી ચડે ને  બપોરની શાંતીને ચીરતો હોય એમ બૂમો પાડવા લાગે: એ…ગૂલ્ફીમલા …. ઈ!!! પછીતો બધી જમાવટ ગામના ચોકમાં જ્યાં કૂલ્ફીવાળો ઊભો હોય. નાનાં તો હોંશે હોંશે લેવા દોડે પણ મોટાંય પાછા ના પડે. ઉપરથી મમરો તો મૂકેજ કે : આપડે કાંઈ થોડા ગૂલ્ફી ખાવા જેવડા છઈ. આતો ઠીક જરા જોઈ લઈ .. કે  કેવીક  લાગેસ!

એ દિવસોમાં  મેં મેટ્રિક પાસ કર્યું હતું. નોકરી ન મળે ત્યાં સુધી આજીવિકા ખાતર ગામમાં બંધ કરેલી હાટડી ફરીથી ખોલી નાખી હતી. હું અને  સંબધમાં મારો ભત્રીજો પણ પાકો મિત્ર કહી શકાય એવો રમેશ વધારે કમાવા માટે શું કરવું જોઈએ એ બાબતની અવારનવાર ચર્ચા કરતા રહેતા. એ ચર્ચાના પરિણામે અમને ગુલ્ફી વેચવાનો ધંધો ઠીક લાગ્યો. એટલે અમે પહોંચ્યા ખાંભા મુકામે ,ધાતરવડી નદીના કાંઠે,ગુલ્ફીના કારખાને.  અમારી રજૂઆત સાંભળીને કારખાનાના માલિકે કહ્યું કે : હું તમને ગુલ્ફીય આપું ને પેટીય આપું. પણ તમારે ગામ પોગાડશો કેવી રીતે? આંયથી નાનીધારીની સીધી બસ તો છે નઈં! બસમાં લઈને વીસાવદરનાં  પાટિયાં  લગી લઈ તો  જાશો . પણ  પછી તમારે ગામ કેમ પોગાડશો?  આ તો  બરફ  કહેવાય! પાણી થઈ જાય! ગુલ્ફીનું ને ભેગાભેગ તમારા પૈસાનુંય!

“ઈ  બધી વાત સાચી પણ ઈનો કાંઈક રસ્તો દેખાડો. ” રમેશે રજૂઆત કરી.

“ઈનો એકજ રસ્તો છે કે તમારી પાંહે સાયકલ હોવી જોઈએ. આંયથી સાયકલની વાંહે પેટી મૂકી નથી ને સાયકલ ભગાવી નથી. કે વહેલું આવે નાનીધારી! બોલો છે સાયકલનો વેંત? ને છે ત્રેવડ રોજ વીસથી પચીસ માઈલ સાયકલ ચલાવવાની?”

અમે મૂંઝાયા. એક્બીજાની તરફ જોવા લાગ્યા. ત્યાંથી રવાના થવા સિવાય છૂટકો નહોતો.

“અમે વિચાર કરીને આવીશું. ” રમેશે વાતનો વીંટો વાળ્યો.

અમે એક ગાંઠિયાની દુકાને પહોંચ્યા.  બાંકડે બેઠા બેઠા અને ગાંઠિયા ખાતા ખાતા અમે ચર્ચા કરી જેનું તારણ હતું કે : આપણી પાસે સાયકલનો વેંત છે નહીં અને કદાચ થાય તોય આ રીતે ગુલ્ફી વેચીશું તો ગુલ્ફી ઓગળતા ઓગળશે પણ એની પહેલા આપણે ઓગળી જાશું. માટે આ ધંધો કરવા જેવો નથી. જે ચાલે છે એ બરાબર છે.

… આમ  અમે ગુલ્ફી વેચવાનો ધંધો કરી શક્યા નહીં. જો કર્યો હોત તો મેં પણ બૂમો પાડી હોત કે:   એ………. ગૂલ્ફી…  મલા……..ઈ!!!!!!

બ્લોગમિત્રો … તમને મારી બૂમ સંભળાઈ?

હા તો પાડો!!!!

7 thoughts on “એ…ગુલ્ફીમલાઈ

  1. તમારી ગુલ્ફી મલાઈની બુમ સાંભળીને ઉનાળમાં બરફનો ગોળો (જેને પંગ કહેતા હતા) યાદ આવી ગયો. હવે ગેલનીયું (અમેરિકનોને ઓછામાં મઝા આવતી નથી) ભરીને આઈસક્રીમ લાવીએ અને ફ્રીજમાં મુકી રાખીએ પણ એવી મઝા નથી આવતી. અને વળી ટેમ્પરેચર સેટ કર્યું હોય એટલે ઉનાળો આવીને ગયો તેની પણ ખાસ ખબર નથી પડતી. ક્યારેક એમ થાય કે કુદરતથી દુર જવાને પ્રગતિ કહેવાય ?

  2. બ્લોગમિત્રો … તમને મારી બૂમ સંભળાઈ? હા સંભળાઈ.

    આજે રાતે આઈસક્રીમ ખાવાનું સારુ બહાનું મળી ગયું. જો કે પછી અમારા એ સવારે ચાલવાનું કે સાઈકલિંગ કરવાનું કહ્શે એવો અંદેશો પણ છે.

  3. શ્રી યશવંતભાઇ
    તમારી બુમ સંભળાઇ અને તરત પાછળ પાછળ બાળપણમાં સાંભળેલી દામા માલમની બુમ પણ સંભળાઇ “આઇતરી…મ..લા..ઇ!!!!!”થર્મોસ લઇને નીકળતા દામા માલમ પાસે જુના કાંણાવાળા જુના બે પૈસાની આઇસ્ક્રીમ(કાગળના કટકા પર આપેલી) તરત જ ન ખાવ તો પાણી થઇ જાય હા એના કરતા કાંડી પર આપેલો ગોકલભાઇનો બરફ્નો ગોળો સારો એમ અમને લાગતું જે ઝટ ઓગળે તો નહીં.એ દિવસોની મઝા જ કઇ ઔર હતી.ઓલી ગઝલ કંઇ ઓછી એમ જ ગવાઇ છે “वो कागजकी कस्ती वो बारीसका पानी…….”
    અભિનંદન
    પ્રભુલાલ ટાટારીઆ”ધુફારી”

  4. એ………. ગૂલ્ફી… મલા……..ઈ!!!!!!

    અહીં આ’ક્રીમની કાર મધુરી ધૂન વગાડતી આવે

    અને

    બધાને પરાણે આપે..

    .તેને ખાત્રી કે

    ડોલર ક્યામ જવાનો છે!

  5. વાહ યશવંત અંકલ , ગામડાનું આબેહુબ ચિત્રણ .! કેવું અદભુત ! અને આખાય નિબંધમાં કેટલી બધી મુમેન્ટ્સ એવી જે સેન્ટી કરી જાય ! છાંયડા માં કુતરાની પણ જગ્યા !વાહ !સાયકલ વગર ગુલ્ફીનો ધંધો ના થઇ શક્યો , તોય હું તો કહું છું કે સુખ એ જ હતું ,આજે છોકરાઓ મોબાઈલ અને બાઈક વગર કોલેજનો ઉબરો નથી ચઢી શકતા.અરે અંકલ તમારા જમાનાની ક્યાં વાત કરવી , મારા જમાનામાં , એટલેકે હું કૉલેજ કરતો ત્યારે પણ મોબાઈલ કોઈ કોઈ પાસે જ . અને પાર્કિંગ માં બાઈકો સાથે સાઈકલો પણ દેખાય , કોઈ કોઈ છોકરી વેસ્ટર્ન આઉટફીટમાં હોય પણ બાકીની બધી સલવાર કમીઝમાં જ હોય .સોરી , વાત જરા વધારે આડે પાટે જતી રહી , પણ મારું માનવું એવું છે કે માણસની જરૂરિયાતો ઓછી જ હોવી જોઈએ .કવિ નર્મદ પાસે જયારે રહેવા ઓટલો ય નહોતો ત્યારે ખુલ્લા આકાશ નીચે તે ચાંદને જોઇને બોલેલા – “કેવી ખીલી સુંદર ચંદા , એમાં બેઠા નર્મદ બંદા !

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s