બિરજુનો આજે નોકરી મટેનો ઇન્ટર્વ્યૂ હતો. આ પાંચમો ઇન્ટરવ્યુ હતો. આગળના ચારમાં એને સફળતા મળી નહોતી.
એને M.C.A.માં સાઈઠ ટકા હતા. PRACTICAL જ્ઞાન પણ સારું હતું. છતાં એને પોતાની લાયકાત પુરવાર કરવાની તકો ઓછી મળતી હતી કારણ કે એને બારમાં ધોરણમાં ફક્ત બાવન ટકા ગુણ આવ્યા હતા. મોટાભાગની કંપનીઓ બારમાં ધોરણમાં સાઈઠ ટકા કે તેથી વધારે હોય એ ઉમેદવારોને જ ઇન્ટર્વ્યૂ માટે બોલાવતી હતી. જે થોડીઘણી તકો મળી હતી એમાં એને સફળતા મળી નહોતી. હરિફાઈ અને સ્ટાફની જરૂરિયાત જેવાં પરિબળો પણ ભાગ ભજવતાં હતાં. આ હકિકત બિરજુ પણ સમજતો હતો. પરંતુ હવે એની ધીરજ ખૂટી ગઈ હતી. લાયકાત સાબિત કરવાનું કાર્ય આટલું કપરું હશે એવું એણે પહેલાં ધાર્યું નહોતું. એને દુનિયાની કડવી વાસ્તવિકતા હવે સમજાવા લાગી હતી.
એ હવે મોટાભાગે ઉદાસ રહેતો હતો. કોઈ પ્રવૃત્તિમાં એનું મન લાગતું ન હતું.મમ્મી-પપ્પા તરફથી કોઈ જાતનું દબાણ ન હતું. એ તો ઉલટાના કહેતાં હતાં કે “ અમને વિશ્વાસ છે કે બધાં સરાં વાનાં થશે.” પરંતુ મધ્યમ પરિવારના સંસ્કાર હેઠળ ઉછરેલ હોવાથી એને જલ્દી કમાતા થવાની અને પપ્પાને રાહત આપવાની ઉતાવળ હતી. …અને બારમાં ધોરણના બાવન ટકા એનો પીછો છોડતા નહોતા!
ઘેરથી નીકળ્યો ત્યારે મમ્મી-પપ્પાએ દરવખતની માફક આજે પણ “ બેસ્ટ ઓફ લક” કહ્યું હતું. પોતે જવાબમાં “થેંક્યુ ” કહ્યું હતું. એ જાણે કે વેરાઈ ગયેલાં હિંમત અને વિશ્વાસ એકઠાં કરીને નીકળ્યો હતો! એણે હૃદયમાં આશાનો દીવો ફરીથી પ્રગટાવ્યો હતો.
એનાં મમ્મી-પપ્પાનાં હ્રદયમાં આશાના ટમટમતા દીવા તો ક્યારેય હોલવાયા જ નહોતા. એટલે તો આખો દિવસ એ રાહ જોતાં રહ્યાં કે ‘ હમણાં ટેલિફોન રણકશે ને બિરજુ હોંશે હોંશે શુભ સમાચાર આપશે.’
પરંતુ ટેલિફોન ન રણક્યો તે ન જ રણક્યો!
….ને ઇન્ટર્વ્યૂ આપીને સાંજે એ ઘેર પછો આવ્યો. એનું મોઢું પડી ગયેલું હતું. એનાં મમ્મી-પપ્પાએ તો નક્કી જ કરેલું હતું કે એ આજે આવે ત્યારે એને ઇન્ટર્વ્યૂ બાબત કશું જ પૂછવું નહીં કારણ કે દર વખતે પોતે પસંદ ન થયાનું કહેતી વખતે એ ખૂબ જ નિરાશ થઈ જતો હતો. ઊગીને ઊભા થયેલા દીકરાની નિરાશા એમનાથી જોવાતી નહોતી.
બિરજુએ પાણી પીધું. એનાં મમ્મી-પપ્પાની ધારણા હતી કે એ હવે કશું કહેશે. પણ એ ધરણા ખોટી પડી. બિરજુ કશું જ બોલ્યો નહીં. હવે તો એ લોકો જ બિરજુને પૂછે તો જ ખબર પડે કે શું થયું. પણ કશું પૂછવાની તો વાત જ ક્યાં રહી? એમનાંમાં તો બિરજુના ચહેરા પર નજર નાખવાની હામ નહોતી રહી. ઘરમાં જાણે કે હવા વહેતી બંધ થઈ ગઈ. નર્યું મૌન વહેવા લાગ્યું! છાતીમાં મૂંઝારો લાવી દે એવું મૌન!
લાં…બી લાં…બી ક્ષણો પસાર થવાનું નામ જ નહોતી લેતી! ને એક ક્ષણ એવી આવી કે એના પપ્પથી મૌન જીરવાયું નહીં. એમનાથી પૂછાઈ ગયું કે “ બેટા, આજે કેવું રહ્યું? ”
ને તરત જ એમને ખ્યાલ આવ્યો કે પોતે ઉતાવળ કરી બેઠા છે. પણ હવે શું થઈ શકે? હવે તો જે કાંઈ સાંભળવું પડે એ હિંમતપૂર્વક સાંભળવું જ રહ્યું. મમ્મી- પપ્પા બેઉ જણાંએ જે કાંઈ સાંભળવું પડે એ સાંભળી લેવાની પૂરી તૈયારી સાથે બિરજુના ચહેરા તરફ નજર નાંખી.
ને બિરજુએ મૌન તોડ્યું. “આજે તો થઈ ગયું.”
એ શબ્દોનો અર્થ તાત્કાલિક સમજવાનું કઠિન હતું. એની મમ્મીએ અધીરાં થઈને પૂછ્યું કે “ થઈ ગયું એટલે?”
“ થઈ ગયું એટલે નોકરીનું પાકું થઈ ગયું. મમ્મી, આજે હું ઇન્ટર્વ્યૂ માં પાસ થઈ ગયો.” બિર જુએ પોતાના ચહેરા પરથી ઉદાસીનો મુખવટો ઉતારી નાખીને કહ્યું.
એના પપ્પાને તો શું બોલવું એની જ સમજ ન પડી. એ છાતીમાં ચોંટેલા મૂંઝારાને ઉખેડવા લાગ્યા.
“ ગાંડા. ક્યારનો કહેતો કેમ નથી? ફોન તો કરવો હતો!!” બિરજુને એની મમ્મીએ ઠપકો આપવાના ભાવથી કહ્યું.
“હું તમને લોકોને સરપ્રાઈઝ આપવા માંગતો હતો. ” બિરજુએ ચોખવટ કરી.
પછી તો ઘરમાંથી મૌન ઊભી પૂંછડીએ ભાગ્યું છે કાંઈ!!!!
********************
એ………..બકવાસ બંધ કર……….!!!!!!!!!!!!
યશવંત ઠક્કર
વળતા પડકારા